𝐅𝐫𝐞𝐞 𝐓𝐡𝐞𝐨𝐫𝐞𝐭𝐢𝐜𝐚𝐥 𝐃𝐫𝐢𝐯𝐢𝐧𝐠 𝐂𝐨𝐮𝐫𝐬𝐞
Old Evacuation Center, Municipal Compound, Binalay, Tinambac, Camarines Sur
March 9, 2024
Ngunyan na aldaw nin Martes, Abril 9, ginibo an Free Theoretical Driving Course (TDC) sa Old Evacuation Center, sa laog kan compound kan satong munisipyo. Sarong inisyatibo kan Lokal na Gobyerno kan Tinambac sa pamamayo ni Mayor Atty. Ruel Brioso Tuy sa pakikipagtabangan kan Land Transportation Office -Partido District Office sa pamamayo ni SVTRO/Chief-of-Office, Ma’am Vanessa Chandria A. Merilles.
An Free Theoretical Driving Course parte kan pigtutulod na programa kan Lokal na Gobyerno kan Tinambac na makakatabang sa pagpapa-asenso kan kabuhayan kan satuyang mga kahimanwa, sa paagi kan pagpapagian kan mga proseso sa saindang pagkua nin mga maninigong dokumento, para magkaigwa nin sadiring lisensya sa pagmaneho.Obheto man kan lokal na gobyerno na mairani an serbisyo sa tao, asin ma-edukar an mga partisipantes sa tamang pagmamaneho para makalikay sa disgrasya, peligro, o anoman na iriwal sa tinampo.
An satuya pong pagtaong pasasalamat sa bilog na personahes kan Land Transportation Office-Partido District Office, sa pagtao nin oras para matawan nin giya asin tamang proseso an mga nagpartisipar sa pigsagibong 1-day Theoretical Driving Course. Mabalos man sa Office of the Mayor, lalong lalo na ki Ma’am Neslie O. Barrameda na iyo an Person-In-Charge kan programang ini sa banwaan, ki Dir. Francisco P. Ranches Jr. CESO VI, Regional Director kan Land Transportation Office-Bicol ROV, ki Ma’am Vanessa Chandria A. Merilles, SVTRO/Chief-of-Office kan LTO-Partido District Office asin sa gabos na nag-apropitsar kan programang ini kan satong lokal na gobyerno.
